طريقه عمل الكيكه الاسفنجيه بالصور وبالتفصيل

شموع · 05-22-2009, 01:21 AM

-بدايه الكيكه الاسفنجيه لا يدخل فى مقاديرها لا زيت ولا زبد ولا لبن ولا عصير
انا استغربت لما لقيت البعض بيضيف لبن او عصير
الكيكه الاسفنجيه مختلفه عن الكيك العادى

2-جميع المقادير المستخدمه بيض او طحين لازم لازم تكون بدرجه حراره الغرفه
يعنى انا دائما بحفظ الدقيق فى التلاجه ولكن قبل ما اعمل الكيكه الاسفنجيه بنص ساعه بخرج البيض والدقيق واوعى تنسى المعلومه دى لانها مهمه جدا حتلاقى قطرات ماء تجمعت على البيض بعد النص ساعه كده تقدرى تستخدمى البيض

3-لو عاوزه الكيك بنكهه البرتقال ضيفى برش برتقاله على البيض بدل الفانيليا وليس عصير البرتقال ولو عاوزه بطعم الفراوله ضيفى روح الفراوله ولكن روح الفواكهه تضاف بعد اضافه الطحين لكن برش البرتقال بيكون مع البيض كبديل للفانيليا

4-الدقيق والنشا والبيكنج باودر اللى حكتبلكم مقاديرهم تحطوهم مع بعض وضرورى جدا جدا تنخلوا الخليط مرتين يعنى حطى البيكنج باودر والنشا على الدقيق وانخليهم سوا ومهم اوى مرتين

5-مهم اوى ان المقادير تكفى صينيه لان لو الخليط اكبر من نص الصينيه يبقى الكيكه حترتفع وتهبط من النص وحتبقى معجنه

6- مهم اوى الفرن يتسخن اثناء تحضيرك للكيك ودرجه الحراره لازم تكون متوسطه لانها لو عاليه او منخفضه حتبقى مشكله والكيكه تبوظ اهم حاجه اظبطى الفرن على درجه 180 واغلقى الفرن لحد ما تنتهى من عمل الخليط
اخواتى معلش انا طولت عليكم بس لازم لازم احكى معاكم بالظبط كل فتفوته لعمل الكيك
واخيرا اللى بيخلى الكيكه مكتومه حاجتين مالهومش تالت الاولى انك مضربتيش البيض المده المحدده ليه وهى ربع ساعه يكون المضرب شغال بدون انقطاع على اعلى سرعه والثانيه انك مضفتيش الدقيق معلقه معلقه ممكن تكونى ضفتيه مره واحده او كميه كبيره كل مره وده بيخلى الكيكه طالعه زى الخبز مكتومه

الان المقادير المظبوطه
طبعا احنا خرجنا البيض والطحين قبل العمل بنص ساعه واول ما نبدا نشتغل نسخن الفرن ونجيب الصينيه ندهنها سمنه وبعدين نحط فيها دقيق اكيد انتوا فاهمين العمليه دى
المقادير دى انا معرفش حتناسبك ولا لا بس عموما وانتى بتصبى الخليط فى الصينيه بتاعتك وطبعا انا معرفش مقاسها يبقى عموما اى خليط لازم يوصل لمنتصف الصينيه لو لقيتى لسه عندك خليط ممكن تحطيه فى صينيه تانيه اهم حاجه للكيك سواء عادى او اسفنجى ان الخليط ميزدش عن نصف الصينيه لانه حيرتفع
المقادير
الكوب المستخدم للدقيق لازم يكون هو هو اللى حتقيسى بيه السكر والنشا
6 بيضات بدرجه حراره الغرفه
كوب الاربع دقيق
كوب الا ربع سكر ناعم مهم يكون حبيباته ناعمه
ربع كوب نشا
ملعقه كبيره بس ممسوحه بيكنج باودر
ملعقه كبيره ممسوحه فانيليا
ربع كوب كاكاو غير محلى
لو عوزاها بيضاء مش بالكاكاو يبقى بدل كوب الا ربع دقيق يبقى كوب واحد فقط وبرده نفس المقادير

سخنى الفرن وبعدين حطى البيض وعليه الفانيليا او بشر البرتقال وعلى اعلى سرعه اضربى البيض والفانيليا لمده دقيقتين وبعدين متفصليش الكهربا عن المضرب وهو شغال بعد الدقيقتين ضيفى السكر مره واحده واحسبى حوالى ربع ساعه على اعلى سرعه فى البدايه حتلاقى المزيج عباره عن رغاوى لكن بعد كده حتلاقى المزيج بقى كريمه وحجمها بقى تلت اضعاف حجم البيض فى الاول لازم يبقى الحجم تضاعف لاننا عاوزين الهوا اللى جعل البيض ينتفخ اول ما تلاقى الخليط تضاعف بعد الربع ساعه شيلى المضرب خالص ومتستخدميهوش تانى فى ناس بتحط الدقيق وتشغل على اقل سرعه وده خطأ كبير جدا جدا الطريقه دى حتخلى الهوا اللى نفخ البيض يخرج تانى ومش حتبقى هشه ابدا
باستخدام معلقه خشبيه ضيفى ملعقه دقيق واحده وقلبى ببطء جدا جدا جدا جدا جدا فى اتجاه واحد اوعى تغيرى الاتجاه او تقلبيها من تحت لفوق وافضلى ضيفى ملعقه دقيق وقلبى مرتين وضيفى الملعقه الاخرى وبرده قلبى تقلبتين بشويش وببطء شديد لازم يفضل الخليط مرتفع لحد ما تخلص ممكن هنا تضيفى روح الفاكهه لو عوزاها بالفراوله او الاناناس بعد ما تخلصى صبى الخليط بشويش وايضا بمنتى البطء فى الصينيه ودخليها الفرن
واياك اياك اياك اياك تفتحى عليها قبل 40 دقيقه بعد اربعين دقيقه اختبريها بعود خشبى لو نضجت طفى النار و اوعى تخرجيها من الفرن خليها جواه لانها لو خرجت وهى سخنه حتتعرض لهواء بارد حتبوظ سبيها فى الفرن بعد ما تقفلي الحراره نص ساعه تقريبا وبعدين خرجيها ان شاء الله لو اتبعتى كل معلومه وطريقه انا كتباها حتلاقى احلى كيكه اسفنجيه عملتيها وكل ما تنجح معاكى افتكرينى
وتانى يوم اعمليها بالكريمه وزينيها ولو مستعجله وعوزاها فى نفس اليوم حطيها فى التلاجه 3 ساعات مثلا بس اوعى تحطيها فى التلاجه بعد ما تطلع من الفرن مباشره يارب اكون افادتكم

ملحوظه بخصوص الدريم ويب(الكريم شانتيه )
التورته تحتاج ربع كيلو للتغليف والتزيين او بما يعادل 6 اظرف هناك نوعان نوع بودره يأتى على هيئه علبه كل علبه فيها ظرف او ظرفان والنوع التانى على شكل كريمه الطبخ بالنسبه للباودر لمن تستخدم باودر بالكيلو مثلا يبقى كل كوب كريمه باودر معها فنجان الا ربع لبن مثلج ونخفق ولو عاوزاها بالشيكولاته ضيفى كاكاو وزودى اللبن بسيط اما فى حاله الأظرف الجاهزه نصيحه منى لا تتبعى التعليمات المكتوبه على ظهر الظرف لان الكريمه حتبقى سائله نصيحتى لك هى لكل ظرفان باودر ضعى فنجان الا ربع فقط لبن مثلج وملعقه كبيره ممتلئه من النشا (الكورن فلاور )وحتحصلى على احلى كريمه متماسكه وضعيها فى التلاجه فتره حوالى نص ساعه قبل البدء بالتغليف والتزيين اما كريمه الطبخ المخصصه ايضا للحلويات اتبعى نفس ماهو مكتوب عالعلبه بالظبط لا تقلقى
الان ما قراتموه هو اساسيات عمل الكيكه الاسفنجيه ولكن
ولكن
ولكن
انا شخصيا احب اضافه الزيت او الزبده لعمل اى كيكه ودى راجعه للذوق الشخصى وغالبا تورتاتى تتنوع مابين كيك اسفنجى وكيك عادى ونا شايفه ان الكيك العادى مناسب كمرحله اولى تقدرى تتعلمى الاول ازاى تعملى تورته وبعدها تنتقلى للكيكه الاسفنجيه ومقادير الكيك العادى لمن تريد هى كوب ونصف دقيق منخول مضاف له ملعقه ونصف صغيره بيكنج باودر _ كوب الا ربع سكر عادى _ نصف كوب زيت او زبد _نصف كوب زبادى _3 بيضات حجم كبير او اربعه صغير_فانيليا لو اردتى عملها بالشيكولاته انقصى ثلث كوب دقيق وضعى بدلا منه كاكاو باودر غير محلى والان مع طريقه عمل الكيكه الاسفنجيه بالصور كتطبيق لما ذكرته سابقا
هنا الطحين والكاكاو والنشا والبيكنج باودر

نقوم بنخلهم كما ذكر سابقا

ونتركهم جانبا نقوم بضرب البيض والفانيلا حوالى دقيقتان وبعدها قومى بأضافه السكر

نقوم بالخفق لمده ربع ساعه على اعلى سرعه الى ان يتحول الخليط للشكل الكريمى ويكون أضعاف حجم البيض

بعد ذلك نقوم باضافه الطحين المنخول ومعه البيكنج باودر والكاكاو ملعقه ملعقه ونقلب كما ذكرت فوق

والان الخليط اصبح جاهز ونصبه فى الصينيه

ونتبع طريقه الخبز والتى شرحتها سابقا وهاهى شكل الكيكه بسم الله ماشاء الله دى بالشيكولاته

وواحده أخرى بيضاء بالفانيليا

هذا هو اساس عملها ننتقل الان الى المراحل الأخرى الا وهى الحشو والتزيين الان سيكون معنا كيكه فكيف نقطعها؟؟؟؟؟؟؟؟
انا افضل تقطيعها بالخيط بدلا من السكين طبعا بعد مابردت تماما
ونقطعها هكذا نلف الخيط حول الكيكه ونوسطه جيدا ويكون هكذا

ثم نقوم بوضع الخيط على شكل حرف xهكذا

ونمسك الطرف الايمن بيدنا اليسرى وطرف الخيط الايسر بيدنا اليمنى يعنى العكس ونشد الخيط ونفضل ماسكينه بقبضه ايدنا ونشد

سنجدها بتقطع ومظبوطه ان شاء الله مائه بالمائه وهنا الحشو انا استخدمت كما فى الصورهدريم ويب باودر وفواكهه وشيكولاته مبشوره
يتتتتتتتتتتبع

__________________

البحث عن مواضيع لنفس العضو

dodo_2008 · 12-25-2010, 03:09 PM

مشكووووووره

فجر الامة · 03-20-2011, 09:48 AM

ارك الله فيك وحفظك ونفعنا بعلمك

مشكووووووووووووووووووووووووووووورة جدا

-------------

هذه اول مشاركة لي.
اذا احببت ان ترسل لي رسالة ترحيبية تستطيع ذلك من خلال المشاركة التالية
هنـــــــا

-------------

hiba_azar · 08-23-2011, 02:55 PM

شكراً على هالوصفات الشهية وانا بردو حبيت افيدكم بوصفة الكيك الاسفنجي اللي تعلمتها من النت من موقع شهية تحديداً والله يطلع روعة ويدوب في الفم وهي مصدر الوصفة http://shahiya.com/ar/%D9%83%D9%8A%D...81%D8%A7%D8%AA

وطريقتها :
كيك اسفنجي

المطبخ: وصفات أمريكية
وقت التحضير: 10 دقيقة
وقت الطبخ: 30 دقيقة
عدد الوجبات: 4

المقادير

1 كوب دقيق
3 بيض
1 كوب سكر
1 ملعقة صغيره فانيلا

طريقة التحضير
1. يخفق البيض و الفانيليا مع اضافة السكر تدريجيا بالمضرب الكهربائي، نستمر بالخفق حتى يصبح قوام البيض مثل الكريمة.

2. يوضع الدقيق على عدة مراحل, مع التقليب بملعقة كبيرة وليس المضرب شرط ان يكون التحريك هادىء و الحركة من اسفل لأعلى. من المهم جدا الا تخبطى الوعاء بالملعقة ولا تهزيه.

3. تدهن صينية متوسطة الحجم بالسمن و ترش بالدقيق حتى يغطى كل جوانب الصينية.

4. يسخن الفرن لحوالى 170-200 درجة مئوية. يوضع خليط الكيك فى الصينية ثم فى الفرن لمدة 25-35 دقيقة

5. ولا يفتح الفرن الا بعد أن تظهر رائحة الكيك.

6. اختبري الكيك بشوكة اغرزيها فى الكيك, لو خرجت نظيفة يكون الكيك قد نضج ... وبالهنا و الشفا
اتمنى تعجبكم

-------------

هذه اول مشاركة لي.
اذا احببت ان ترسل لي رسالة ترحيبية تستطيع ذلك من خلال المشاركة التالية
هنـــــــا

-------------

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 3 ( الأعضاء 0 والزوار 3)